خرافة الحطاب مرعي وزوجتة مبروكة

قالك يا سيدي بن سيد أيام الدنيا دنيا والناس ناس إيخبرو ساعتها على نجع كان يسكن فية واحد ينقاله مرعي وكان خونا مرعي فقير وكان متجوز وحدة أسمها مبروكة وكان عندهم 3 أولاد و3 بنات وكان مرعي فقير ويخدم حطاب عند شيخ النجع وكانت مبروكة صابرة وأتساعد فيه وتمشي مرات أتساعد فية وهو إيحطب وبنتها الصغيرة على ظهرها باقي العويل في جرتها وكانت تحصد عند العرب مش أتحصل شعير وقمح مونه لها ولعيالها وزوجها وكان كل عرب النجع يحكوا على تضحياتها وتعبها وصبرها على الفقر .. حتى رجال القبيلة ديما إيقولو لي مرعي أنك كاسب دعي الولدين ربي أمطيحك في زوجه طيبة وصبورة زي مبروكه ..
ودارت الأيام وأستمر هالحال أعوام وفي يوم من الأيام مرعي قرر يبعد على النجع يبي إيجيب حمولة حطب لبيت الشيخ على خاطر زواج ولد الشيخ
ناض الفجر صاحبنا مرعي ولقي حمارة جاهز وفية مونت 3 أيام وودع مبروكة وعويلة وأتسقد ..
مشي مرعي وبعد على النجع وطاح في وادي أمعبي حطب ربط حمارة وبدي إيحطب
دورة قعد يسمع في صوت واحد إيعيط وإيطيح .. مشاله مرعي جري لقاه الراجل قريب ايموت من العطش والجوع جاب الراجل وبخله وجهه وقعد يسقي فيه بالشوية بالشوية لعند أرتاح الراجل والحمد لله مرعي نقد حياته .. رقد الراجل وكمل مرعي خدمتة وتحطيبة .. قرب المغرب ووقف مرعي ووقد نار

بيطيب العشاء نوضت الراجل وقاله إن شاء الله صرت طيب توا يا خوي .. قاله الراجل بخير يا ولد الأجواد وأنت فضلك عليا وجميلك في رقبتي لين أنموت .. قاله مرعي أحكيلي قصتك وكيف رحت في الصحراء قاله أنا راجل غني وعندي البل والسعي وعندي الذهب وطلعت رحلة صيد مع رفاقتي لكن غدرو بيا وسمعتهم وأنا راقد في الليل يتفاهمو عليا يبو يقتلوني .. خليتهم رقدو وهربت منهم وضيعت جرتي وطريقي لعند ما طحت فيك .. قاله أساعه تتعشوا ونرقدو وغدوا الفجر أنوصلك لعند عربك ونجعك
.. وفعلآ تعشو ورقدو وناضو الفجر تسقدو لنجع الراجل ومرعي شرط على الراجل أنه ما يقعد وحكاله على عرس ولد الشيخ وان ما يقدر ايعطل عليهم بالحطب
الحصيلة وصلوا لنجع الراجل وسلم الراجل على هله وشكرو مرعي وأعزمو عليه بس حكالهم الظرف
عطوه العرب مونة الطريق وأتسقد وهو ماشي لحقه الراجل وكان معاه صندوق معبي ذهب وفضة و10 نياق وقريب 50 راس غنم قالة هذة بسيطة مني لك وحلفتك بالغوالي تقبلها
فرح مرعي وقبل الهدية وأتسقد لنجعه ولهله فرحان

..
وصل مرعي لبيته وهو إيقول يا مبروكة يا مبروكة وسعها الله عليا وسعها الله عليا وحكي لزوجته وللنجع شن صار معاه ..
وبدي مرعي صاحب جاهه وعز وصاحب رزق وخيل

ونياق ..
ومرت شهور وتغير مرعي وبدي شايف روحه على مبروكة الي قاعده تقتصد وماتبي اتبعزق النعمه والذهب هنا وهناك وقعد مرعي ايقوللها انتي فقرية وانتي وجه نكد وأنتي وأنتي ..
صبرت مبروكة وما ردت علية عيبته وسكتت
وفي يوم من الأيام جوها العرب لبيتها وخبروها أن مرعي يبي يتجوز عليها وحدة تانية وحيديرلها بيت كبير وذهب وعرس كبير ..
أنقهرت المسكينه وحزنت

واجد وفعلآ تجوز مرعي ودار عرس كبير وهجر مبروكة وعويلها .. وقعد مبروكة مضحكة عند بنات النجع إن كان مشت للبير او للحطب وإيقولولها سيبك وانتي شينه والكلام هذا ..
زوجة مرعي التانية كانت اتحب نفسها وتجوزت مرعي على خاطر رزقه وفلوسه وقعدت تستغل فيه هي وهلها لعند دارو رزق من وراه ..
الحصيله في يوم من الأيام مرعي كان امقعمز جنب البيت جت لفعة

لذغاته ومرض والسم انتشر في جسمه وجاته حتى تقازة النجع وحاولت فيه بس قالتلهم السم أنتشر في جسمه وانه حيموت في اي وقت سمعت مبروكة بالخبر ودارت عويلها ومشت جري لبيت زوجها التاني وهي تنذب وأتعيط وضرتها طبعآ فرحت وتستنى فيه ايموت باش تاخد باقي الرزق هي وهلها وقعد اضايق في مبروكة بالكلام ..
مبروكة ناضت للعرب وقالتلهم مدامه بيموت انقلوه لبيته الأول نبيه ايفارق غادي وفعلآ نقلوه العرب ومبروكة مسكينه اتعاني وتسأل على دواء عرب يشفي زوجها وينقده من الموت وفعلآ قالولها في دواء لكن في نجع بعيد وفي الشك اتلحقي تمشي واتجي ..

الجزء التاني من خرافة مرعي ومبروكة

نوت مبروكة وقالت بنتوكل على الله أنا وواحد من عويلي ووصت التقازة تقعد جنب زوجها
وتوكلت على الله وكانت متأثرة جدآ وخاطرها موجوع على زوجها
مشت وولدها إيقوللها يما خلي نرتاحوا شويه وانكملوا وهي اتقوله لا ياولدي باتك بيموت لو عطلنا ووصلوا للنجع الي فيه الدواء

وخدو الدواء ورجعوا بيه على نجعهم طول وليل عليهم الليل وهما يمشوا والولد ايقوللها يما خلي انباتوا والفجر نتسقدو وهي ترفض وتبي اتكمل مش ترجع بالدواء

بسرعة
وهما ماشين كان في غنم وراعيه راقد وناض قعد يسمع في صوت خيل

يسحابهم مخانب وقطاع طريق قعد يرمي عليهم في الرصاص ووحدة من الرصاصات جت في المسكينة مبروكة قتلتها قعد الولد ايعيط

لعند وقف الراعي وجاء يجري للولد ولقاهم ولد وامه ندم الراعي وقعد يبكي وقاله عليم الله نحسابكم مخانب وقاله حتى انتم غالطين كيف تمشوا في الليل
طبعآ الناس الأوله بس تنزل الشمس يبرك وايبات طول يعني مستحيل يمشوا في الليل

حكالة الولد على القصة الصايرة وربطوا جثة المرحومة على الخيل واتسقد بيها الولد ووراه الراعي يبكي وينذب
ولما وصلوا انصدموا أهل النجح من الحادثة الي صارت للمسكينة
واندفنت والكل يبكي عليها وزعلان
ووصل الدواء للتقازة وخداه مرعي وبعد اسبوع فاق وتحسن صحته وجوه العرب حكوله على كل شي صار وكيف ضحت مبروكة بحياتها على خاطر هو ايعيش
ندم مرعي وأنقهر وكره كل شي سيب الرزق والعويل وزوجته التانية وكل شي
وكل ما يسألوا عليه العرب او ايدورة يلقوة جنب قبر مبروكة
وقعد زي المثل بين العرب لعند ما مات حتى هو ..

مشيت عليهم وخليتهم بودني اسمعتهم وبعيني ما ريتهم

جهد مميز ورائع
سلمت الايادي
على روعه الانتقاء

عبادى كتب:: جهد مميز ورائع
سلمت الايادي
على روعه الانتقاء

شكراً للمرور

» خرافة أم بسيسي ..
» خرافة بات البنات
» خرافة (عويشه بنت الحوات....)
» خرافة اللوزه والحاجه رقيـه ...