في يوم غليني يحرق والغبيري ايكتح والدنيا شاعته ضاربها الجفاف ..مرضت سالمه مرت الحاج يونس من النو وقلة الميه ..
دار رجليه في غمره واطلع يجري بيها زي المهبول ..وسالمه قريب تموت من السخانه ومن الجفاف ..
برا ساعه وساعتين وتلاته لن سالمه فقدت الوعي .. وهوا تايه في هداكا الخلى ماعارف وين يمشي ..
دوره ....شاف شجره كبيره .. هداكا الظل وهداكا العشب الاخضر ..والميه طالعه عين تحتها .. والدنيا كلها خضرا الله ايبارك ..
قال هكي ..اتغمر زوجته سالمه وحطها على كتافه لن اوصل هديكا الشجره ..
فرش عباته و حط سالمه تحت الشجره وهي مغمى عليها من العطش..
جابلها اميه من العين لي جنبه . واقعد ايبردلها في طرافها وقبوعتها ..وايشرب فيها النهار كله لن خداه النوم ..
رقدو هديكا الليله وعالصبح فاقت سالمه وصحتها ماشاء الله ..سبحان مغير الاحوال ..
شوي وهو راقد بين نوم وافطان يسمع فيها تدعي واتقول ..
يااارب ارحم من زرع هالشجره ..يارب اعطيه في الجنة زيها عشره ..ومن كل ورقه رحمه ..ومن كل عرق مغفره ..ياربي ارحم من زرعها واعطيه حياش عندك ..ومزارع في جنتك ..واعطيه زي عالعين عيون.. وزي هالظل قصور.... وبرا من هالدعى الباهي ..
مهم وهيا تدعي والحاج يونس ايقول أمين ..
فجأه وعلى غفله .... سمعوا عزوز واقفه ورا الشجره تبكي وقايمه ايديها لربي والدموع ينزلو وهيا فرحانه من وسط خاطرها لا تعرفها تبكي لا تضحك ..
يونس ....! خيرك يا عمتي علاش تبكي انشاء الله خير بس ..
ردت عليه هديكا العزيز وقالت .. ياولدي نبكي من الفرح ما نبكي من الهم ..
تعال يا ولدي نحكيلك عالشجره انت ومرتك مابين ما طاب الشاهي .
حطت الحطب وحطت عليه البراد وخلاته ايركرك وبدت تحكيلهم عالشجره...
هدا يا ولدي و يابنتي زمان كان فيه ابنيه صغيره اسمها رقيه ..
كانت تطلع كل يوم الصبح تتفرج على خلق ربي من طير وحيوان ونبات وهات من الخلق...عمرها ما قلقت منه..
في يوم وهيا تلعب تحت زيتونه ..طاح عليها عصفور صغير حتى عيونه مازال ما انفتحوا ..
وشن دارتله يا حاجه .. قال يونس ...
ردت الحاجه وقالت ... ماعرفت كيف تتصرف لكن قلبها الطيب قادها للطريق... جبدت تستمالها وغطت هداكا العصفور عالمطر والصقع ودخلاته معاها للحوش ..
برا برا برا .. العصفور بدى يزوي ..شوره جاع ..
عرفاته رقيه انه جيعان وامشت تجري للمطبخ جابت كمشه لوز وبدت اتوكل فيه..
اللوزه الاولى والتانيه والتالته.. لن حصلت لوزه في رقبته وانخنق ومات ..
رد يونس وقال ..ياساتر ساتر
ايه يا وليدي ..قداش ما اوجعها وندمت.. لن قريب كلت الجيفه على خاطره ..
ومانفوتكم بالحديت .. من ندمها ودموعها قررت انها تحفرله قبر صغير .. وحفره حفرة باش تردمه فيها ..
المهم شوي وهي تحفر طلعت قطيرات اميه من تحت التراب .. ما عدلتش وكملت الحفر و ردماته ..
برا يازمان تعالى يازمان .. هديكا الحفره ولت عين ..وهداكا العصفور ولي سماد واللوزه لي في بطنه ابدت شجرة .. وهالسواني والخضره والخيرات هدي كلها من هداكا العصفور ..
رد يونس وقال .. وانتي يا عمتي هيا نفسها البنت لي كانت صغيره واسمها رقيه ولا... ؟
قالتله اي نعم يا ولدي ..
قاللها باهي كيف انكافوك ونردولك هالمعروف وهالجميل ..
ابتسمت الحاجه رقيه .. وقالت :
ربي كافاني من زمان ...من سمعت دعى زوجتك سالمه ودعى الجيران..
ربي كافاني ووفاني... من يوم ما ندمت عالعصفور اللي جافاني ...
اندم على غلطك لو كان جى بالصدفه.. وكان درته بيدك توب وربي يكفى.
اندم على كل حد اغلطت في حقه ... وضمد جـــرح انسان كنت اسببه ..
ما ايدوم فيها كان فعل الخير .. بياض النيه والقلب اللي فيه ضمير ..
موضوع: خرافة اللوزه والحاجه رقيـه ... 
