برا يازمان ..تعالى يازمان ..اتزوج السي ميلاد من مرا اسمها فتحيه ..
فتحيه الله يخلف عليها ..لاعمرها غلطت ..ولا عمرها كدبت ولا عمرها قالت فيه كلام باطل ..
السي ميلاد كان عكسها .. طول النهار وهوا امطرم ..لاوي زومته...ولسانه احرف ..قاطع ..ويشري في المشكله اشرى..
وفي ليلة امظلمه روح السي ميلاد للحوش ..وزي العادة....اردك الباب برجله وخش ايعيط .. ..وين العشى ..وين الميه ..الله ينزعك... شن زوجني فيك ..يالعن هالوقت اللي عرفتك فيه ..وبراااا من الكلام الماسخ الوجاع ..
و فتحيه مسيكينه زي العاده تحاول اتهدي وتساير ..
غير هدي روحك يا ميلاد..عشاك واتي و الدنيا ليل والصغار يرعشو ..خش اتعشى وارتاح ...الصبح قول ماتبي ونسمعك ..غير خش واهدى توا ...
وكل ما تقول كلمه ايوجعها بعشره ..لن كبرت القصه في هديكا الليله وفاتت حدها غاااادي ..
الراجل استغول وطلع من عقله .. وشوي ابصر كيف تلفت ايمين لقى عصاة الفاس .....قال هكي وشحطها على رقبتها جابها طايجه في مكانها ..
ياساتر شن درت لروحي قعد ايقول .. ويجري من مكان لمكان زي الزربوط مش فاهم شي ..
المهم البس شلاكته .. وسكر باب الحوش ..وطلع في عقاب الليل ايدور وايمخمخ فيها في راسه ..زعما شنو الحل ..فتحيه ماتت وانا اللي قتلتها .. تي شنو الدباره في هالليله الزقحه هدي ؟
مهم وهو قاعد ايخمم شبح واحد يعرفه يقولوله حسن.. قام رجليه في غمره وامشاله يجري..
تي زود يا حاج حسن راني درت امصيبه ...
رد عليه حسن ..خيرك يا ميلاد شن درت في هاللليل .. خيرك ترعش قول..
يا حسن تعاركت انا مرتي واضربتها.. اشبح كيف جتها الضربه وماتت ..!!
ردعليه الحاج حسن بكل برود .. عادي تصير ياميلاد مش اول واحد يقتل انت ..غير اصبر تو انفكرلك في حل ..اصبر بس ما اتشرقنيش..
قال هكي حط ايده تحت لحيته وقعد ايقلب فيها في راسه وقاله تعرف كيف يا ميلاد...
توا في الشارع لي ورانا فيه عرس ولد البي عاطف والتدريجه اتخبط ..اول ما يكمل العرس شوف واحد امروح بروحه في هالظلام واقتله حتى هوا ..
تلفت ميلاد للحاج حسن وقاله كيف كيف ..
قتلك اقتله ...وقيمه وحطه جنب مرتك وقول راهو لقيته معاها وقتلتهم الزوز ...اهم شي تقتله بنفس العصا باش ما يشك حد ..
روح السي ميلاد والطريق كلها وهو ايمخمخ فيها في راسه .. لن اوصل قدام باب حوشه .. ودوره اخطم شاب طول وغلط وفي هداكا الظلام ما فرزاش باهي ...
قال هكي اجبد العصا وشحطه على قبوعته جابه يابس في مكانه ..
اقعد ايكركر فيه لن دخل جثمانه للحوش ..وحطه جنب فتحيه ..واطلع يجري للناس جيهت العرس وايعيط ...الحقوني لقيت راجل في حوشي واقتلته هوا ومرتي ..قتلتهم الزوز ..كل شي الا الشرف.. واهو ورجعت شرفي ..
جو الناس يجرو معاه ومعاهم شويباني واكل الشيب لحيته..والسي ميلاد ايسب في هداكا الشيباني ماخلى كلمه ما قالهاله ..
ياوجه الفقر يا بياعين الشرف .. هدي بنتك فتحيه اللي ديما اتدافع عليها ..شوفها شن دارت ..اهي باعت شرفك وشرفي ..ياريتني ما ناسبتك ولاعرفتك ولا عرفت بنتك ..
وبرااااا خود من هالكلام والكدب والتبلي عالمسيكينه فتحيه ..
ديل من الناس يسبوا ويلعنو في فتحيه..وديل منهم يسبو في الشويباني ..بو فتحيه قدام عيونه وهوا مسكين متبلغم ومش قادر يصدق اللي صار ..
المهم السي حسن صاحب الدباره الحرفه قعد ايدف في الناس من الزحايم يبي يشوف حتى هوا فتحيه والشاب وهم ميتين..شمايتي الله يلعنه ..
ودوره قال هكي طبس عالشاب وحول من على وجهه الدم والغطى وعينه ما تشوف الا النور ..
يشبح للراجل الميت وهو مش مصدق ..وايقول .. تي هدا ولدي ..هدا ولدي ياميلاد علاش قتلته ..تو من الناس كلهم مالقيت الا ولدي .. وهو يندب وايعيط الله لا تربحك يا ميلاد .. الله لا تخلف عليك وبراااا من هالكلام ..
ومن كثر ما فقد صوابه .. بدى يحكي للناس في القصه والحقيقه ..
مهم في نص عياطات الحاج حسن وعلى غير توقع من حد فاقت فتحيه ..تريتها الضربه ماجتهاش في المقتل وربي مزال عاطيها طول العمر .
فاقت فتحيه والناس سكتت اتشوف ..فاقت والدموع معبيه عيونها ..تشبح للناس وحقارتهم كيف صدقوا العيبه اللي انقالت عليها .. وتشبح لراجلها ميلاد كيف رضى فيها حتى وهي ميته ..وهي تشبح والدموع سيول رت وجه بوها زي البدر طالع من هداكا الحولي ..
ناضت تجريله ومن حزنها وفرحتها اتقول ...... :
الناس صدقت لي انقال عليا ..انسو طيبتك و زين ما جبت من دريه..
الناس صدقت كـــلام ســــكارا ..اوبــاش يكرهو الطـــيب عزيز اقداره ..
كان نسوتي يا بوي بتـــريحهم ... دلني على طريق الموت بالاشاره ..
وحق من خلق الوطى باللي فيها .. مادرت عيبه.. لااا وما انفكر فيها ..
صبرت صبر اسنين بالك ننسى.. توسدت دمعتي والفرح مني يجفى
الحق حق يا سيدي وكان اتأخر.. يجي يوم يطلع من الرماد وما يتبخر .
وهدي قصه جديده وفيها حكمه نتمنى انها وصلتكم ومسيتكم بالخير ..
موضوع: ميلاد و الدباره الحرفه.. 
